Трапічны шторм Ідалія стаў ураганам і пагражае амерыканскаму штату Фларыда

Трапічны шторм "Ідалія" ператварыўся ва ўраган 3-яй катэгорыі і пагражае ўзбярэжжу штата Фларыда. Пра гэта паведамляе The New York Post.

Эксперты лічаць, што па меры набліжэння да ўзбярэжжа, хуткасць ветра дасягне 120 міль у гадзіну (каля 200 км/г). Чакаецца, што ўраган дасягне берагоў ЗША раніцай у сераду. Таксама сіноптыкі не выключаюць, што хуткасць ветру "Ідаліі" яшчэ павялічыцца і дасягне 190 міль у гадзіну (каля 300 км/г), што зробіць яе ўраганам самай разбуральнай, 5-й катэгорыі.

Губернатар Фларыды Рон ДэСантыс аб'явіў надзвычайнае становішча ў 46 з 67 акруг штата. Жыхары 21 акругі атрымалі апавяшчэнні аб эвакуацыі, прычым у некаторых раёнах, размешчаных на ўзбярэжжы і ў нізінных мясцовасцях, эвакуацыя з'яўляецца абавязковай.

Чакаецца, што з-за ўрагану ўзровень вады можа падняцца на 3,5 м. У раёны магчымага праходжання ўрагану перакінуты некалькі тысяч вайскоўцаў Нацыянальнай гвардыі.

Варта адзначыць, што раней шторм абрынуўся на Кубу, асабліва моцна ад яго пацярпелі заходнія раёны вострава. А ў правінцыях Пінар-дэль-Рыа і Артэміса былі эвакуіраваны дзесяткі тысяч чалавек.